၂၀၁၆- နှစ်သစ်ကူးဆုတောင်း

wishes

၂၀၁၆- နှစ်သစ်ကူးဆုတောင်း

ရက္ခိုင်မိဘပြည်သူလူထုများနှင့် အဖိနှိပ်ခံ မြန်မာနိုင်ငံ သားများအားလုံး နှစ်သစ်တွင် လွတ်လပ်စွာ၊ ငြိမ်းချမ်းစွာဖြင့် လိုရာဆန္ဒအဝဝပြည်ဝနိုင်စေကြောင်း မိမိတို့ရက္ခိုင့်တပ်မတော်မှ နှုတ်ခွန်းဆက်သ အပ်ပါသည်။

၂၀၁၆ – ခုနှစ်သည် လူတိုင်းလိုလားတောင့် တနေသော ဒီမိုကရေစီအပြောင်းအလဲ၊ ငြိမ်းချမ်းရေး များကို ဆောင်ကြဉ်းလာသောနှစ်တစ်နှစ် ဖြစ်ပါစေကြောင်း ဆုဆောင်းမျှော်လင့်မိပါသည်။ သို့သော်လည်း မြန်မာနိုင်ငံ၏ ဒီမိုကရေစီ အပြောင်းအလဲနှင့် ငြိမ်းချမ်းရေးလမ်းစများမှာ လှမ်းမြင် နေရသော်လည်း ၎င်းခရီးသို့ ချီတက်ရာလမ်းကြောင်းတွင် အခက်အခဲ အဖုအထစ်များ ရှိနေသေး သောကြောင့် ၎င်းအတားအဆီးများကို တူညီပြီး မှန်ကန်သော စိတ်သဘောထားများဖြင့် အတူတကွ ဖြေရှင်းနိုင် ကြလိမ့်မည်ဟု ယုံကြည်ပါသည်။ ထို့အပြင် လက်ရှိမြန်မာနိုင်ငံအတွင်းတွင် ဖြစ်ပွား နေသော တိုက်ပွဲများကို နိုင်ငံရေးနည်းလမ်းဖြင့် မှန်မှန်ကန်ကန် စေ့စပ်ဖြေရှင်းနိုင်ရန် သက်ဆိုင်ရာ တာဝန်ရှိပုဂ္ဂိုလ်များအနေဖြင့် လုပ်သင့်လုပ်ထိုက်သည်များကို လုပ်ဆောင်ကြရန်ကိုလည်း ရက္ခိုင့် တပ်မတော်မှ မေတ္တာရပ်ခံ ပန်ကြားအပ်ပါသည်။

နှစ်ပေါင်း(၆၀)ကျော်ကြာဖြစ်ပွားလျှက်ရှိနေဆဲ ပြည်တွင်းစစ်တိုက်ပွဲများအား အဆုံးသတ်ပြီး ပြည်သူလူထုတစ်ရပ်လုံးလိုလားသော ဘဝဆန္ဒ၊ နိုင်ငံရေးဆန္ဒများနှင့် ပြည့်စုံစေပြီး လှပသော အနာဂတ်ကို တည်ဆောက်နိုင်ပါစေကြောင်း ဆန္ဒပြုအပ်ပါသည်။ ရက္ခိုင့်တပ်မတော်အနေဖြင့် မလွဲမရှောင်သာ စစ်ရေးအရ ခုခံကာကွယ်စစ်ပွဲများ ကို ဆင်နွှဲနေရသော်လည်း နိုင်ငံရေးအရ တွေ့ဆုံ ဆွေးနွေးအဖြေရှာရန်လုပ်ငန်းအား အမြဲတမ်း ကြိုဆိုပြီး အဆင်သင့်အနေထားတွင် ရှိနေပါကြောင်း မိဘပြည်သူတစ်ရပ်လုံးအား လေးစားစွာအသိပေးအပ်ပါသည်။

ရက္ခိုင့်တပ်မတော်အပေါ် မြန်မာအစိုးရ၏ မြန်မာစစ်တပ်မှ လူအင်အား၊ လက်နက်အင်အား အများအပြားဖြင့် ပြင်းထန်ရက်စက်သော ထိုးစစ်ဆင်တိုက်ခိုက်ချေမှုန်းနေမှုများအပေါ် အားလုံးမျက်မြင်ကိုယ်တွေ့ပင် ဖြစ်ပါသည်။ ရက္ခိုင်အမျိုးသားထုတစ်ရပ်လုံးအနေဖြင့် ဤကဲ့သို့သော ကိစ္စရပ်များအပေါ် စိတ်မကောင်း ဆုတောင်းပေးနေရုံမျှဖြင့် အဖြေထွက်လာမည်မဟုတ်ဆိုသည်ကို သိနားလည်ပြီး ရက္ခိုင်လူမျိုးတစ်ရပ်လုံး စုစည်းညီညွတ်စွာဖြင့် အမှန်တရားအတွက် ရဲရဲဝံ့ဝံ့ တသားတည်းရပ်တည်ကြရန် တိုက်တွန်းနှိုးဆော်လိုက်ပါသည်။

ရက္ခိုင့်တပ်မတော်၏ လုပ်ငန်းစဉ်များတွင် မျိုးချစ်စိတ်ဓာတ်ထက်သန်စွာဖြင့် စိတ်အား၊ ကိုယ်အား၊ ရန်ပုံငွေ၊ အကြံကောင်း၊ ဉာဏ်ကောင်းများကို ဝိုင်းရံပံ့ပိုးပေးကြသူများ၏ တိုင်းပြည်နှင့် လူမျိုးအပေါ် ထားရှိသော အမျိုးသားရေးစေတနာကို မိမိတို့ရက္ခိုင့် တပ်မတော်မှ လေးလေးနက်နက်မှတ်တမ်းတင် ဂုဏ်ပြုအပ်ပြီး ၎င်းတာဝန်များကို ဆတက်ထမ်းပိုး ဆောင်ရွက်နိုင်ကြရန်ကိုလည်း ဆက်လက် တိုက်တွန်းအပ်ပါသည်။

“ ရက္ခိုင့်တပ်မတော်၏တိုက်ပွဲသည် ရက္ခိုင်ပြည်သူလူထု၏တိုက်ပွဲဖြစ်ပြီး ရက္ခိုင့်တပ်မတော်၏ အောင်မြင်မှုသည် ရက္ခိုင်လူမျိုး၏ အောင်မြင်မှုဖြစ်သည်” ဆိုသော သဘောတရားအတိုင်း မိမိတို့လူမျိုး၏ ကောင်းမွန်သော အနာဂတ်တခုအတွက် ၂၀၁၆ နှစ်သစ်ကာလတွင် မျှော်လင့်ချက် အသစ်၊ ခွန်အားအသစ်တို့ဖြင့် လျှောက်လှမ်းနိုင်ကြရန်အတွက် ရက္ခိုင့်တပ်မတော်မှ နှစ်သစ်ကူး ဆုတောင်း လိုက်ပါသည်။

စစ်ဦးစီးချုပ်
စစ်ရုံးချုပ်
ရက္ခိုင့်တပ်မတော်