မြန်မာ့နိုင်ငံရေးတွေ့ဆုံဆွေးနွေးပွဲ ဆီသို့ ဦးတည်လာသော (၂၁) ရာစု ပင်လုံညီလာခံအား ကြိုဆိုကြောင်း MNTJP/MNDAA၊ PSLF/TNLA၊ ULA/AA တို့၏သဘောထားထုတ်ပြန်ချက်

Joint stm

 မြန်မာ့နိုင်ငံရေးတွေ့ဆုံဆွေးနွေးပွဲ ဆီသို့ ဦးတည်လာသော (၂၁) ရာစု ပင်လုံညီလာခံအား ကြိုဆိုကြောင်း MNTJP/MNDAA၊ PSLF/TNLA၊ ULA/AA တို့၏သဘောထားထုတ်ပြန်ချက်

၁၃၇၈ ခုနှစ်၊ တော်သလင်းလဆန်း (၃) ရက်                                                                             ၂၀၁၆ ခုနှစ်၊ စက်တင်ဘာလ (၄) ရက်

၁။ ပြည်ထောင်စုငြိမ်းချမ်းရေးညီလာခံ-(၂၁)ရာစုပင်လုံ (ပထမအကြိမ်အစည်းအဝေး) ကို သြဂုတ်လ (၃၁) ရက်မှ စက်တင်ဘာလ (၃) ရက်ထိ ကျင်းပနိုင်ခဲ့သည်မှာ မြန်မာနိုင်ငံ၏နိုင်ငံရေးပြဿနာကို ငြိမ်းချမ်းသည့် နိုင်ငံရေးတွေ့ဆုံဆွေးနွေးပွဲဆီသို့ ဦးတည်လာသည့်အတွက် ထောက်ခံကြိုဆိုကြောင်း မြန်မာနိုင်ငံအမှန်တရား နှင့်မျှတမှု အမျိုးသားပါတီ-MNTJP/MNDAA၊ ပလောင်ပြည်နယ်လွတ်မြောက်ရေးတပ်ဦး – PSLF/TNLA နှင့် ရက္ခိုင်အမျိုးသားအဖွဲ့ချုပ်-ULA/AA တို့၏ သဘောထားကိုထုတ်ပြန်ကြေညာအပ်ပါသည်။

၂။ (၂၁)ရာစုပင်လုံညီလာခံတွင် တက်ရောက်လာကြသည့် အဖွဲ့အစည်းအသီးသီး၊ အစုအဖွဲ့အသီးသီးနှင့် လူပုဂ္ဂိုလ်အသီးသီးတို့၏ တင်ပြချက်စာတမ်းများသည် ဖက်ဒရယ်ဒီမိုကရေစီပြည်ထောင်စုနိုင်ငံ အစစ်အမှန် တည်ဆောက်နိုင်ရန် အပြုသဘောဆောင်သည့် တင်ပြချက်များဖြစ်သည်ဟု ရှုမြင်ပါသည်။

၃။ မြန်မာ့နိုင်ငံရေးပြဿနာကို နိုင်ငံရေးနည်းလမ်းဖြင့် ဆွေးနွေးအဖြေရှာရန်အတွက် ပွင့်လင်းမြင်သာစွာ တင်ပြ ခွင့်ပြုခဲ့သည့်အပြင် နိုင်ငံတစ်ဝှမ်းလုံးရှိ တိုင်းရင်းသားမိဘပြည်သူများ သိရှိဝေဖန်နိုင်ရန် တိုက်ရိုက်ထုတ်လွှင့်ပြသ ပေးခဲ့သည့် လက်ရှိမြန်မာအစိုးရ၏ ရဲဝံ့ပြတ်သားသည့်လုပ်ဆောင်ချက်မှာ နိုင်ငံရေးပြုပြင်ပြောင်းလဲမှုအတွက် အရေးပါသည့်ခြေလှမ်းတစ်ရပ်ဖြစ်ပါသည်။ ထိုတင်ပြချက်များကို လက်တွေ့ကျကျသုံးသပ်ဆွေးနွေးပြီး နိုင်ငံရေး ပြဿနာအတွက် ကြိုးပမ်းအဖြေရှာရာတွင် မှန်ကန်စွာအသုံးပြုနိုင်လိမ့်မည်ဟု မျှော်လင့်ပါသည်။

၎။ သို့ပါသော်လည်း ငြိမ်းချမ်းရေး မူ (၆) ရပ်နှင့် ၂၀၀၈ ဖွဲ့စည်းပုံအခြေခံဥပဒေကို အခိုင်အမာကိုင်စွဲ တင်ပြသည့် မြန်မာ့တပ်မတော် နှင့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီတို့၏ တင်ပြချက်မှာ မြန်မာနိုင်ငံ ၏ငြိမ်းချမ်းရေး၊ ဒီမိုကရေစီပြုပြင်ပြောင်းလဲရေးနှင့်ဆန့်ကျင်ဘက်ဖြစ်နေပြီး၊ ထိုသဘောထားရပ်တည်ချက်များ ပြုပြင်ပြောင်းလဲရန် အချိန်တန်ပြီ ဖြစ်ပါသည်။

၅။ ဒေါ်အောင်ဆန်းစုကြည် ဦးဆောင်သည့် NLD မြန်မာအစိုးရ၏ လက်ရှိငြိမ်းချမ်းရေးကြိုးပမ်းမှုလုပ်ငန်းများ ပိုမို အောင်မြင်ဖြစ်ထွန်းပြီး၊ မြန်မာ့နိုင်ငံရေးပြဿနာများကိုတွေ့ဆုံဆွေးနွေးအဖြေရှာနိုင်သည်အထိ ပါဝင်သင့် ပါဝင် ထိုက်သူများ၊ အစုအဖွဲ့များ အားလုံးပါဝင်နိုင်သည့် ညီလာခံအစည်းအဝေးပွဲများ ဆက်လက်ပြုလုပ်ရန် မျှော်လင့်ကြောင်း မိမိတို့ မဟာမိတ် (၃) ဖွဲ့ ၏  သဘောထားကို ထုတ်ပြန်လိုက်ပါသည်။


မြန်မာနိုင်ငံအမှန်တရားနှင့်မျှတမှုအမျိုးသားပါတီ/        မြန်မာအမျိုးသားဒီမိုကရက်တစ်မဟာမိတ်တပ်မတော် – MNTJP/MNDAA

ပလောင်ပြည်နယ်လွတ်မြောက်ရေးတပ်ဦး/                          တအာင်းအမျိုးသားလွတ်မြောက်ရေးတပ်မတော် – PSLF/TNLA                                   

 ရက္ခိုင်အမျိုးသားအဖွဲ့ချုပ်/ရက္ခိုင့်တပ်မတော် – ULA/AA